त्रिभुवन आर्मीलाई खप्तड गोल्डकपको उपाधि

0
526

धनगढी । विभागीय टोली त्रिभुवन आर्मी क्लबले नेपाल आईस सुदुरपश्चिम खप्तड गोल्डकपको उपाधि जितेको छ । सोमबार भएको फाइनलमा अर्को विभागीय टोली सशत्र प्रहरीको एपीएफ क्लबलाई पेनाल्टी सूटआउटमा ५ – ४ ले पराजित गर्दै आर्मीले उपाधि जितेको हो ।

धनगढी रंगशाला भएको प्रतिस्पर्धात्मक खेलको निर्धारित ९० मिनेट गोलरहित बराबरीमा सकिएपछि खेलको निर्णय पेनाल्टी सुटआउटबाट गरिएको हो । पेनाल्टी सुटआउटमा एपीएफका सुदिप सिन्क्राकारले गोल गर्न नसक्दा उपविजेतामा चित्त बुझायो । उनको प्रहार पोस्ट बारमा लाग्दै बाहिरिएको थियो । तर, एपीएफका अन्जन बिष्ट, नबिन लामा,रन्जन बिष्ट र पासाङ्ग लामाले गोल गरेका थिए । आर्मीका नवयुग श्रेष्ठ,सन्तोष तामाङ, दिप लामा, दिपक गुरुङ र विवेक बस्नेतले गोल गरेका थिए ।

उपाधिसँगै आर्मीले ट्रफीसहित ११ लाख ११ हजार १११ नगद पुरस्कार प्राप्त गरेको छ । उपविजेता बनेको एपीएफले ५ लाख ५५ हजार ५५५ नगद पुरस्कारमा चित्त बुझाएको छ । खप्तड गोल्डकपको उपाधिसँगै आर्मीले यो बर्ष चौथो उपाधि जितेको छ । आर्मीले यसअघि सताक्षि गोल्डकप,मेची नेत्रालय काकरभिट्टा गोल्डकप र विशाल मेमोरियलको उपाधि जितेको थियो ।

प्रतियोगिताको उत्कृष्ट खेलाडी बन्दै आर्मीका भरत खवासले यमाहा मोटरसाईकल पुरस्कार प्राप्त गरे । त्यस्तै व्यक्तिगत विधातर्फ उकृष्ट गोलरक्षक आर्मीका विकेश कुथु, उत्कृष्ट डिफेन्स एपीएफका टोप बिष्ट, उकृष्ट मिडफिल्डर आर्मीका सन्तोष तामाङ, उदयमान खेलाडी सुदूरपश्चिम ११ का अमानाथ शेख र सर्वाधिक गोलकर्ता एपीएफका अन्जन बिष्ट भए । व्यक्तिगत विधामा उत्कृष्ट हुनेले समान १५–१५ हजार प्राप्त गरेका छन् ।

प्रतियोगितामा आर्मी मनाङ मर्स्याङ्दीलाई ३ – १ ले हराउदै फाइनलमा पुगेको थियो । यता, एपीएफ भने आयोजक सुदूरपश्चिम ११ लाई २ – ० ले हराउदै आर्मीसंगको भेट पक्का गरेको थियो ।

सुदूरपश्चिम स्पोर्ट्स क्लबको आयोजनामा भएको प्रतियोगितामा भुटानको एक टोलीसहित १२ टोलीको सहभागिता रहेको थियो । बिजेता खेलाडीहरुलाई राष्ट्रिय खेलकुद परिषद (राखेप) का सदस्यसचिब केशब कुमार बिष्ट, क्लबका अध्यक्ष सुरेश हमाल, ओलम्पियन दिपक बिष्ट लगायतले पुरस्कृत गरेका थिए ।

Facebook Comments

comments

प्रतिक्रिया दिनुहोस

Please enter your comment!
Please enter your name here